ئەبۇ ئەلى ئىبىنسىنانىڭ «يۈرەك دورىلىرى» ناملىق ئەسىرىدىن

ئون تۆتىنچى فەسھىل

ئىچىنى سۈرگۈچى دورىلار ئىككى سەۋەپ ئارقىلىق يۈرەكنى قۇۋۋەتلىگۈچى دورىلار قاتارىغا كىرىدۇ. بىرىنچىدىن، ئۇنىڭ بىلەن پۈتۈن بەدەندىن ياكى مېڭە بىلەن يۈرەك تەرەپتىن زەھەرلىك ۋە ئەزىيەت بەرگۈچى خىلىتنى سۈرۈپ چىقرىش كۆزدە تۇتۇلىدۇ. مەسىلەن: سوقمۇنىيا قايناتمىسى ۋە سوقمۇنىيادىن تەييارلىنىدىغان شەبيارغا ئوخشاش. ئىككىنچىدىن، سۈرگىنى ئىشلىتىشتىن مەقسەت پەقەت يۇقىرىقىدەك ئىچىنى سۈرۈشلا ئەمەس بەلكى ساپ روھتىن تۇغۇلۇش ئۈچۈن مەخسۇس يۈرەكتىكى قاننى تازلاش مەقسەت قىلىنىدۇ. مەسىلەن: يۈرەك دورىلىرىغا لاجىۋەرد تېشى ۋە ئەرمەن تېشى قاتارلىقلارنىڭ قوشۇلغىنىغا ئوخشاش.

  بۇ دورىلارنىڭ قۇۋۋىتى يۈرەككە يەتسە بۇنىڭدىن يۈرەكنىڭ تەبئىيىتى ئۆزىگە كەلگەن قاندىن سەۋدالىق خىلىتىنى ۋە ئۆزىدە تۇغۇلغان روھتىن سەۋدالىق بۇغىنى تازىلاپ چىقىرىش ئۈچۈن قۇۋۋەت ئالىدۇ. بۇ مەنپەئەت يۈرەكتىن مېڭىگىمۇ ئۆتىدۇ.

  ئىچ سۈرگۈچى دورىلار يۈرەككە زەرەر قىلىدۇ. چۈنكى ھەر بىر بوشۇتۇش (چىقىرىش) تا تەبىئەتكە ئىككى تۈرلۈك زەرەر يېتىدۇ. بىرىنچىسى، تەبىئەتكە ماس كەلمەيدىغان ۋە يېقىملىق بولغان نەرسىمۇ سۈرۈپ چىقىرىلىدۇ. ئىككىنچىدىن، سۈرگە ئەزالاردىن خىلىتلارنى تارتىش ئارقىلىق ئەزالارغا ھۇجۇم قىلىدۇ، تەبىئەتكىمۇ ھۇجۇم قىلىپ، ئۇنىڭغا كۈچ كەلتۈرىدۇ. چۈنكى تەبىئەت خىلىتلارنى ئۆز ئورنىغا تارتىپ، ئۇ يەردە تۇتۇپ تۇرىدۇ. سۈرگە دورا بولسا بۇنىڭ ئەكسىنى قىلىدۇ. سۈرگە تەبىئىتى قۇۋۋەتتە زەئىپلىك ۋە ئاجىزلىق ھاسىل قىلمىغۇچە بۇنىڭغا ئېرىشەلمەيدۇ.

تەرياق ئىچ سۈرۈشنى توختىتىش بىلەن بىرگە قۇسۇشنىمۇ توختىتىدۇ. چۈنكى ئۇ تەبىئەتنى كۈچەيتىدۇ ۋە ماددىسى زەھەرلىك بولغان ۋە شۇ زەھەرلىكلىكى تۈپەيلىدىن چىقىرىپ تاشلىنىۋاتقان نەرسىنى يېڭىدۇ.

ئۇيغۇر تېبابەتچىلىك ژورنىلى 1996- يىللىق سانىدىن ئېلىندى.